Մեր տատիկների գաղտնիքները. ամրացնում ենք մազերը

Մազաթափման եւ խամրած մազերի խնդիրն անհանգստացնում է ոչ միայն առողջության հետ կապված խնդիրներ ունեցող մարդկանց: Ամեն օր միլիոնավոր մարդիկ հսկայական գումարներ են ծախսում այդ խնդրի դեմ պայքարելու համար: Բայց 60-70 տարի առաջ, երբ տեխնոլոգիաներն այսքան զարգացած չէին, այս խնդիրը ձանձրացնում էր նաեւ մեր տատիկներին, ովքեր թանկարժեք շամպուններ կամ դիմակներ գնելու հնարավորություն չունեին: Իսկ թե ինչպես էին ազատվում այդ խնդրից, կպատմի NEWS.am STYLE-ի թղթակցի տատիկը՝ Լիա Զախարյանը:

«Գլուխը լվանալ գոլ ջրով, առանց օճառի, այնուհետեւ, նրբորեն մերսելով գլխամաշկը, աղով տրորել: Եվ այսպես՝ 10-15 րոպե: Մազերը լվանալ: Այս գործողությունը կրկնել 6 անգամ: Տատիկս նաեւ վստահեցնում էր, որ այս միջոցը չոր գլխամաշկ ունեցողներից շատերին փրկում էր ճաղատացումից:

Ուժեղ մազաթափման դեպքում նախ հարկավոր է ամրացնել դրանք: Դրա համար 1-2 ամսվա ընթացքում շաբաթը մեկ անգամ անհրաժեշտ է գլուխը լվանալուց կես ժամ առաջ մազարմատներին սպիրտի եւ գերչակի յուղի հավասար հարաբերակցությամբ պատրաստված խառնուրդ քսել: Հետո մազերը լավ լվանալ: 1-2 ամիս անց, երբ մազերը կամրանան, կարելի է անցնել դրանք բուժելուն:

Մազարմատները լավ վերականգնում է գերչակի յուղով, դեղնուցով եւ սոխի հյութով դիմակը: 1 միջին չափի սոխի հյութը խառնում ենք նույնքան գերչակի յուղի եւ 1 դեղնուցի հետ: Լվանալուց 45 րոպե առաջ ստացված զանգվածքը քսում ենք գլխամաշկին, ծածկում պոլիէթիլենի տոպրակով եւ սրբիչով: 45 րոպե անց մազերը լավ լվանում եւ խնամքով սանրում ենք: Հարկավոր է պարբերաբար կրկնել այս բուժումը»:

Հարցեր, պատասխաններ, մեկնաբանություններ